ئەڤین ئیبراھیم فەتاح
لە١٩٩٨ و ١٩٩٩ لە
رێکخراوێکی ژنان کارم دەکرد. جارێکیان ئافرەتێکی رازاوەی بەکێشی قەڵەوی خۆی زێڕی پێوە
بوو بینیم ئەندامی سکرتاریەتی گەورەترین رێکخراوی ئافرەتان بوو کە بودجەو دەسەڵاتیان
لە ھی وەزارەتێک پترە. زێَو ماکیاژو زەوقی ناشیرینی جلەکانی سەرنجی رانەکێشام بەڵکو
رایە نەستەق و باخداروەکانی رایان کێشام.
وێنەی ھەمان ئافرەتم
پاش ھەفتەیەک لەدوالاپەڕەی گۆڤارەکەی خۆیان بینی لەگەڵ وتارێکدا ناونیشانەکەیم لەبیر
نەماوە بەڵام ناوەڕۆکەکەی ئەوەبوو بەڵگەی دەھێنایەوە بۆ ئەوەی ئیقناعمان بکات کە بەراستی
قسەی پێغەمبەری موسڵمانان راستەو ژن کەم عەقَڵ و کەم دینە!
ئیدی بەڵگەکانی
(زانستیانە) بوون، ئەوە بوو ئەوکات ئیقناع بووم بەوەی ئیرادەی خوایەو ئێمەی کەم عەقڵ
ھەر بۆ کوشتن باشین..وازم ھێنا لەکاری رێکخراوەیی و چوارمشقی لێی دانیشتم!
ئەمڕۆ ئەم بابەتەم
بیر ھاتەوە کاتێک ئەو ھەواڵەم خوێندەوە کە ئەمساڵیش یەکەمەکانی مەکتەبەکان لە خوێندن
کچۆڵەن! بیرم دەکردەوە وتارێکیان لەسەر بنووسم و بێژم دەستە ناسکەکانتان خۆش بێت سەرتان
بەرز کردین. کەچی تەلفۆنێک زنجیرەی بیرەکانی پچڕاندم و بابەتەکەی بۆ ئاقارێکی دیکە
برد.
گەنجێک ھەیە دەموچاویم
نەبینیوە بەڵام خۆی دەڵێ پلەیەکی بەرزم ھەیە لەحکومەت، واتا لەنزیکەوە نایناسم، جار
جار تەلەفۆنم بۆ دەکات دەستخۆشی بابەتەکانم لێ دەکات کە دڵنیام بەقەد پەنجەی دەستێک
وتارەکانمی نەخوێندوەتەوە! ئەمشەو تەلەفۆنی کرد و پرسی: بۆچی بەرۆژوو نابیت؟
- بابەتێکە پەیوەندی بە خۆم و خواوە ھەیە گرینگ
ئەوەیە بەدرۆ نایەژم بەرۆژووم و بەدیم بۆ کەس نەبووە!
- دەستگیرانەکەم گەرەکیەتی قسەت لەگەڵ بکات،
- سەرچاوم فەرموو
دەستگیران خان:
- تۆ چۆن بەم شێوەیە بیر دەکەیتەوە عەقڵت زۆر
سنووردارەو بیعەقڵیت.... ورێژنەیەک جنێو!
- خانم بێ زەحمەت ناوت چیە؟
- ناوی خۆی وت
- فڵانێ خان تۆ من ناناسیت و نەتدیوم چۆن رێگە
بەخۆت دەدەیت جنێوم پێ بدەیت و بەئاگری جەھەنەم ھەڕەشەم بکەیت و بمکوفرێنیت، ئەی لەبەر
خاتری من نا ئەوە من ملم ئەشکێنم و بەتەنیا ئەچمە ناو گۆڕەوە، بەڵام تۆ دەمت بەرۆژووە
بەجنێو رۆژووەکەت سووک دەبێت؟
گفتوگۆکە فرە درێژ
بوو و لەبازنەیەکی داخراودا دەخوولایەوەو ھەردوکیان بەنۆرە جنێویان دەدا لەپێناوی ئەوەی
من عاقڵ ببمەوە! زانیم فرە دڵسۆزن بۆم بەڕادەیەک ئەوە ناچێتە عەقڵیانەوە کە مرۆڤی جیاواز
ھەیە، لای ئەوان ئەو کەسەی وەک ئەوان بیر نەکاتەوە بێعەقڵە!
ئەم سێ چیرۆکە بردمی
بۆ ناو بابەتێکی بێ ئەنجام:
- بەقسەی پێغەمبەر بێت من و ئەو ھەموو خانمەکانی
ناو ئەم وتارە کەم عەقڵ و کەم دینین.
- خانمی یەکەم و خانمی کۆتایی خۆیانیان پێ عاقڵە
لەبەر ئەوەی خودا ھیدایەتیانی داوە عەقڵی داونەتێ
- خانمە یەکەمەکانیش ھەموویان خانمی عاقڵی فرە
دینن
- دەی تەنیا من کەمینەی بێ عەقڵم، کەواتە بەپێچەوانەوە
زۆرینە، ژن نە کەم عەقڵەو نە کەم دین..بەڵام ئەگەر ئەم راستیەمان درکاند دەبینەوە بە
کەم عەقل و کەم دین!! من سەرم لەم ھاوکێشەیە دەرناچێت!
